Dokumentá

E dokumentashon di nos patrimonio ta sosodé pa medio di kolekshoná i transkribí publikashonnan tokante Boneiru i su habitantenan. Banda di esaki nos mes tambe ta registrá e patrimonio aki pa medio di grabashon di ekspreshonnan foklóriko, manera storia, muzik i kustumbernan. Mayoria di e produkshonnan aki ta hasí na Papiamentu pa promové e uso di nos idioma indígeno. Ta tradusí algun di e materialnan aki na ingles i/òf hulandes, pa asina e ta aksesibel pa un públiko mas amplio.

Nos tin na e momentu aki mas ku 2000 entrevista grabá, un kantidat di dokumental i produkshon spesial riba diferente tópiko ku tin di aber ku e patrimonio kultural inmaterial di Boneiru. Ademas di esaki tin manuskrito, artíkulo i buki skirbí i publiká.

Na 2019 a lansa Bonaire.tv. Un kanal di televishon den kua ta bini na remarke programanan den kua e patrimonio históriko, kultural i di naturalesa, bou di kua tur produkshon di FuHiKuBo ta kai. Aparte di Boneiru, e dokumental i programanan aki ta pasa tambe na Kòrsou, Aruba, St. Maarten i Hulanda.