Biahe di trabou na Kòrsou

Biahe di trabou na Kòrsou

Siman pasá nos tabata na Kòrsou pa un biahe di trabou intensivo i hopi balioso. Por konkluí ku tabata un bishita eksitoso i fruktífero.

Den kuadro di e buki den proseso di publikashon 'Lucha - Historia di rebelion na Boneiru', un kolaborashon ku Mangazina di Rei i artista lokal Nòchi Coffie, nos a hasi un investigashon ámplio na Archivo Nashonal Kòrsou. Un proyekto ku a bira posibel grásias na un supsidio di Herdenkingscomité Slavernijverleden. Tambe nos a bishitá ofisina di ‘Herdenkingscomité Slavernijverleden’ pa sera konosí i kombersá tokante e buki ‘Lucha’ i tambe posibel proyektonan pa futuro.

En konekshon ku e proyekto ‘Agènda di Akshon Pasado di Sklabitut Boneiru’ nos a hasi bishita di trabou serka diferente partner importante. Entre otro nos a kombersá ku nos koleganan di Mongui Maduro Histrorical House Museum, NAAM - National Archaeological Anthropological Memory Management i Archivo Nashonal Kòrsou.

Probechando di e bishita aki nos a logra hasi diferente grabashon di e programa Herensia ku invitadonan markante i interesante, manera Harry Moen, Ron Gomes Casseres, dos integrante di ‘The Three Voices’, Laura Quast, Percy Pinedo i Erwin Koenze. Mas aleu nos tabata invitado den e programa Moru Bondia na TeleCuraçao, durante kua nos a papia tokante e programa Herensia i tambe di nos fundashon.

E bishitanan i kombersashonnan aki no solamente a enrikesé nos pa nan kontenido, pero tambe a reafirmá e importansia di sigui traha huntu pa konservá, traspasá, i hasi nos historia i herensia mas visibel.