Entidat Públiko a aseptá petishon di FuHiKuBo

Entidat Públiko a aseptá petishon di FuHiKuBo

Entidat Públiko di Boneiru, gobièrnu, a aseptá e petishon di Fundashon Históriko Kultural Boneriano (FuHiKuBo) pa un kontrato di kuido mas aseptabel i hustu pa por kumpli ku su mishon pa salbaguardiá patrimonio kultural-históriko di Boneiru.

Resientemente presidente di FuHiKuBo, F.D. ‘Bòi’ Antoin, a pone su firma bou di e kontrato di kuido aki. FuHiKuBo ta gradisidu na gobièrnu i ta karga speransa ku esaki ta un komienso pa un futuro duradero.

Dékadanan di dedikashon
For di 1998, ku masha poko sosten finansiero, FuHiKuBo a logra forma un kolekshon úniko di artefakto, buki, portrèt históriko i material oudiovisual. Ademas, e fundashon a dokumentá historia oral di Boneiru pa hopi aña via programanan di radio i televishon, manera Herensia di Siglo 20, ku despues a bira simplemente Herensia. Durante hopi aña gran parti di e trabou aki a bira posibel danki na aporte finansiero personal di e direktor i sosten di spònsor i donashonnan insidental.

Despues di kasi tres dékada di trabou dediká na registrá, dokumentá i protehá historia i kultura di Boneiru, FuHiKuBo finalmente a logra un paso importante den sosten pa su trabou.

Sosten limitá
Na aña 2003 FuHiKuBo a risibí su promé sosten limitá di gobièrnu, esta un kamarógrafo pa graba e programa di televishon Herensia. Ku e kolekshon kresiendo, huntu ku e gastunan, a bira opvio ku mas sosten struktural tabata nesesario.

Anke FuHiKuBo a risibí un kontrato di kuido (supsidio) di Entidat Públiko, e apoyo aki nunka tabata sufisiente pa garantisá sostenibilidat tampoko kresementu. Desde 2020 un grupo di hóben profeshonal a tuma inisiativa pa mihorá e situashon finansiero di FuHiKuBo i pa pone mas énfasis riba importansia di e organisashon.

Rekonosimentu
FuHiKuBo ta akreditá pa UNESCO komo un NGO ku ta promové i salbaguardiá patrimonio kultural intangibel di Boneiru. Ademas, e programa Herensia a haña akreditashon di UNESCO-Hulanda den e registro di ‘Memory of the World’.

Na 2024, FuHiKuBo huntu ku e departamentu di ‘Post & Archief’ di Entidat Públiko Boneiru a firma un akuerdo den kuadro di e asina yamá ‘Actieagenda - Digitalisatie en Toegankelijkheid van Archieven’. E proyekto aki tin komo meta pa protehá i hasi herensia kultural di Boneiru mas aksesibel pa medio di digitalisashon, desaroyo di archivo i inisiativanan edukativo pa komunidat.

Adaptashon
Pa logra ehekutá e proyekto di ‘Actieagenda’ ku éksito, FuHiKuBo a pidi un adaptashon di su kontrato di kuido. Despues di lunanan di diálogo, presentashon i motivashon na tantu Konseho Insular komo Kolegio Ehekutivo, gobièrnu finalmente a aprobá e petishon. Gobiernu a disidí pa otorgá e montante kompletu ku FuHiKuBo a solisitá. Esaki ta e promé bes ku FuHiKuBo ta risibí un kontrato di kuido ku un montante realistiko pa por kubri su gastunan.

Ku e paso importane aki, FuHiKuBo por sigui ku su mishon e aña aki. Nos ta spera ku esaki tambe ta e komienso di un relashon konstruktivo ku OLB. Un relashon den kua finansiamentu struktural i duradero finalmente ta risibí e lugá nesesario pa protehá i sigui desaroyá Boneiru su patrimonio kultural.