Ekipo di Herensia ta bai hasi grabashon na Aruba

28th Oct, 2022

Despues di sigur 4 aña di ousensia

Den luna di novèmber benidero e ekipo di FuHiKuBo ku ta produsí e programa di televishon Herensia, lo ta durante un siman na Aruba pa hasi grabashonnan nobo pa e programa aki. Ta despues di 4 aña ku ta graba atrobe na Aruba. Bòi Antoin i Ludovico Nicolaas lo kondusí e grabashonnan.

Normal kada un pa dos aña tabata hasi grabashon di Herensia na Aruba, pero debí na e pandemia di Covid esaki no por a tuma lugá último añanan. Awor finalmente e oportunidat ta presentá. E programa Herensia ta hopi konosí na Aruba. E ta pasa tur wikènt na dos okashon na TeleAruba, esta djasabra i djadumingu.

E último dos personanan grabá na Aruba pa Herensia tabata Madonna Stephens i Olga Velasquez. Despues no a bai Aruba mas graba, anke ta asina sí ku a entrevistá rubianonan ku a bishitá Boneiru último añanan.

E produktornan di Herensia a kuminsá ta rekrutá hende kaba pa entrevistá. Pero hendenan na Aruba mes, òf hendenan di Boneiru ku tin hende di edat (preferibel riba 70 aña), lo por yama Bòi Antoin na +599 7866818. E mesun number aki tin tambe whatsapp. Por manda un e-mail tambe na b.antoin.extra@gmail.com.

E periodo ku lo graba ta di 12 pa 20 di novèmber. Ta bon pa yama lihé, pasobra e lista ta yena lihé.